O se tasi lenei o atinae o loo ave ai le faamuamua a le tele o itumalo mo le poloketi o le miliona e pei ona faatinoina.
O le itumalo o Faasaleleaga Muamua ua faamatuuina i le tele o aiga o afioaga o loo aofia i totonu o le itumalo e ala lea i meafaigaluega e faaaogāina i atinae e pei o faatoaga, lafumanu, faigafaiva ma faasao o loo faafoeina e le itumalo.
I se ata pueina e le upega tafailagi a le itumalo o loo faaalia ai le agaga faafetai o nisi o sui o le itumalo e tusa ai ma lenei faamāmāavega auā le faatinoina o atinae.
Na ta’ua e se tasi o sui o le itumalo Fonoia Galugalu e tusa ai ma le faamatuuina o lenei vaega.
“Ua toeitiiti lava ona mae’a faasopolia nai aiga o loo ave lava le faamuamua i atinae o faatoaga, lafumanu ma isi.
“Faafetai ai i nei fuafuaga uma lea ua tini lava ma faataunuu lenei faamoemoe.”
Faailoa e se tasi o tamā mai Tafua ia Lefu Faafetai o le faafetai i le Malo aemaise le Sui o le Itumalo ua fesoasoani tele nei meafaigaluega mo ia ma lana atinae.
“E tele lava le tāua ma le aoga aua foi le tau atinaeina o aiga i lenei vaitau e fesoasoani lea i faatoaga aua foi le la’uina o meamata i le fale aemaise o popo mo mea tuaolo.”
E faapena foi se lagona i nisi o tamā mai lenei afioaga ia Faamate Sālū ma Tuitafua Ioelu.
“Ia o uilipaelo ma agaese na momoli mai o le aso lava na aumai ai na faaaogā ai lava auā foi le tausiga o aiga.
“Momoli le faafetai i le Ofisa o le Itumalo i le faasafua mai o nei mea faigaluega e galueaina ai faatoaga.”
E lē itiiti pea le faafetai a le itumalo o loo faamatuu ai nei fesoasoani e pei ona faatinoina e le Ofisa o le Fono Faavae ina ia laugatasia uma i vaega taitasi o loo faagasolo pea mo aiga taitasi.
