O le malelega faamanuia o le Kerisimasi a le afioga i le Ao o le Mālō le afioga Tuimalealiifano Sualauvi II ua ave ai lava faafetai ma le faamalo i le faigamalo fou.
O le uluai malelega faamanuia lea i le tulai mai o se uluai tamaitai Palemia o Samoa e taitaia upufai o le Mālō talu ona tutoatasi le atunuu ua lata ai nei i le 60 tausaga. E le’o toe lilo i le atunuu ma le lalolagi mea na tutupu ma aliali mai i le tuanai o le palota tele ia Aperila ma o ni taimi sa souā ai upufai o le Mālō.
I le saunoaga a le Ao o le Mālō ma ia saunoa ai “Lau Afioga i le Tamaitai Palemia ma lau Kapeneta, o’u te faamalo atu i lo outou tulai mai i le foe faatautai le sa o Samoa i le paeaiga lona 17 lenei a le Palemene. O’u te faamalo atu foi i lau afioga Fiame Naomi Mataafa i le avea ai o lau afioga ma uluai Palemia tamaitai o le Mālō tutoatasi o Samoa. E ui i fatia ua alu i mataupu na tulai mai i upufai o Mālō a’o lea ua te’a le tai sousou ma ua togo mālama aua e lē tuulafoaina le tatou atunuu e le Atua. Ia tulu’i mai lagī lo outou soifua laulelei aemaise le poto ma le faaaliga mai le nofoalii o le alofa tunoa e taitai ai le Sā o Samoa i le manuia ma le to’a filemu. Ia faamanuia le Atua i lo outou tulai mai”.
Na ia saunoa foi “Lau afioga i le Fofoga Fetalai ma sui mamalu uma o le Palemene o Samoa faamalo le soa faafetai le pale i le faia o upufai o Mālō, o feeseeseaiga i o outou talitonuga faavaega faaupufai e tutupu ai pea mataga i liu o vaa ma e iai aso e folau ai i le malū ma aso foi e taili ai le matagi toga. O luitau ia o le soifuaga e feagai pea ma soo se taitai a’o la’u tatalo ia taitaiina e le agaga pāia o le Atua la outou faatofalaiga ma ia fusi pea i fau o Mālō ae lautua i le alofa ma le fefaamagaloa’i aua o le
finagalo lena o Iesu Keriso le pepe o le Kerisimasi e Manuia ai foi Samoa ma lona Mālō.”
Na faafetaia ai foi e le Ao o le Mālō i le afioga i Faamasino Sili ma le vasega o faamaisno mo le galuega i lenei tausaga ua lata ina maea.
