O taaloga ua mae’a a le tatou Toa Samoa i le taamilosaga o le Ipu o le Lalolagi i le lakapi liki ua faafetaia ai e le Peresetene o le taaloga i lo tatou atunuu le afioga Tagaloa Faafouina Su’a, le tapua’ia o le alofaiva o tama fanau a le atunuu.

O se lagona faagaeetia o Tagaloa ona mai lava i le amataga o taumafaiga a le aulakapi a le atunuu, e ui na malolo le Toa Samoa i le taaloga muamua ma Egelani, ae o se toilalo na vavane ai i fafo le lotonuu o alo ma fanau ma toe timata le upega ia latou taaloga na sosoo ai, seia oo ina sao atu i semifinals.

Sa maua se avanoa e faatalanoa ai le Peresetene i se tulaga ua iai tapenaga i lenei taimi a le Toa Samoa, a o lumanai le taaloga faigata ma Ausetalia e saili ai le siamupini o le Ipu o le lalolagi ona o Ausetalia o se tasi o ‘au malosi i le taaloga lakapi liki ma o loo i le vaega o ‘au o le Tier One. 

O se faatalanoaga ma le Peresetene o le taaloga lakapi liki i Samoa le afioga Tagaloa Faafouina Su’a.