Ua ave le faafetai a le Palemia o Fiti i le Palemia ma taitai o le Malo o Samoa, ona o le taulamua pea o le tatou atunuu i le ‘apo’apo o le tāua o le tutu faatasi o Malo o le Pasefika i ana tonu ma faaiuga fai, pe a oo ina faafesagai ma taitai o malo e malolosi o latou tamaoaiga.
Na saunoa le Palemia o Sitiveni Rabuka e avea ma sui o nisi o taitai o le Pasefika sa valaaulia i sauniga o le tutoatasi ua mae’a, a o faia le tali faaaloalo o se taumafataga a le Malo o Samoa ina ua malolo polokalame o le taeao o le 61 tausaga o le tutoatasi.
O le saunoaga foi lea sa molimauina le ootia o lagona o le alii Palemia ina ua toe talanoa i le mafutaga mafana a Samoa ma lona atunuu mai le amataga ina ua faavae le fono a taitai o le Pasefika, ona o ē sa taitaia Malo i lea taimi sa galulue ma tutu faatasi mo le saili o auala e manuia ai tamaoaiga o atunuu taitasi.
Na asia e le alii Palemia o Fiti le lala o le iunivesite a le Pasefika i Saute i Alafua, ma ia faailoa ai o loo taumafai lana faigamalo soofaatasi e totogi uma aitalafu a Fiti o ona sao tau tupe mo le faagaioia o le Iunivesite a le Pasefika o loo i Fiti, o ni sao tautupe sa taofi ona toe totogi e le faigamalo sa iai a lea atunuu.
Sa feiloai atu foi lea taitai i le taitai o le vaega e puipuia aiātatau a tagata le susuga Tuilaepa L Sailele Malielegaoi ma faia ai se ‘ava faatali a le pati faaupufai i lona nofoaga tutotonu i Sogi e faafeiloai ai le Palemia o Fiti.
Ua tulimatai e le alii Palemia o lea malo tuaoi le toe malaga mai i Samoa i le tausaga fou pe a aulia, mo le fono a taitai o Malo o le Taupulega i le masina o Oketopa 2024.
Ae o le toe taliu ai i Fiti o lea taitai faalemalo, o le tamaitai Palemia le afioga Fiame Naomi Mataafa ma nisi o minisita o le Kapeneta sa afifio i le malaevaalele i Faleolo e momoli ma faatofa i le Palemia o Sitiveni Rabuka, lea a o lei talaaao i le vaalele sa ia asiasia muamua le tulai faaaloalo a leoleo i le malaevaalele o se faaaloalo faalemalo e faamauina ai le mamalu ma le faaaloalogia o taitai o isi Malo e pei foi ona sa faatino e le Malo o Fiti, ina ua malaga iai le tamaitai Palemia i le masina o Fepuari o le tausaga nei, mo le fono a taitai o le Pasefika sa usuia ai.
