O le susuga ia Alfredo Perez Bravo o le Amepasa o le Malo o Mexico i Samoa lea na feiloai ai ma le Ao Mamalu o le Malo o Samoa, le Afioga Tuimalealiifano Vaaleto’a Sualauvi II i lona maota i Vailele.
O le tausaga e 2008 na faavaeina ai le faigapaaga a malo e lua ma na ta’ua e le Amepasa o le a faamautuina atili ai lenei faigapaaga e ala lea i nisi o mataupu mo le atina’e manuia o tagata lautele e pei o se maliega i le fefaasoaa’i o faamatalaga i lafoga i le 2012.
O loo auai uma malo e lua i lalo o le faamalu a Malo Aufaatasi ma o le a galulue faatasi e faaauauina nisi o manulauti a le Malo Aufaatasi e pei o le tausiaina o le filemu, faalauiloaina o le puipuiga o le aiātatau ma avanoa tutusa.
O le afioga i le Amepasa o loo ia taulimaina se faailoga tikeri tau i sootaga faavaomalo mai UNAM faatasi ai ma le Iunivesite FRESCATI i Sweden ma aoaoga maualuga i Sineva.
E 46 tausaga o le tomai tau auaunaga faavaomalo mai le tausaga 1976, ma e 52 atunuu ua mafai ona auauna ai lenei tamalii i le tofiga Amepasa e aofia ai Aferika, Amerika, Karipiane, Asia, Europa ma le Oceania.
O Bravo sa filifilia i le 2019 e avea ma Amepasa o Mexico i Niu Sila e aofia ai lona tulaga aloaia mo Samoa, Toga ma Tuvalu.
