O le Aso Lulu o le vaiaso nei i le laumua o Ausetalia o Canberra, na faafeiloai ai e le Palemia o lea Malo le tamaitai Palemia o Samoa ma tatala ai le kapeta mumu, o se faailoga o taligamalo mamalu ma maualuga, ma faia foi le tulai faaaloalo a le fitafita o Ausetalia ma asiasia e le tamaitai Palemia le afioga Fiame Naomi Mataafa, ma tāina le vii o le saolotoga o Samoa.
O le uluai asiasiga taualoa lea a le taitai o le Malo Tutoatasi o Samoa i le valaau faaaloalo a le Malo o Ausetalia talu ona pale i le tofi Palemia o le tatou atunuu.
Ua faailoa i se pepa o faasalalauga faalauaitele mai le Ofisa o le Malo o Ausetalia, o le mae’a o le faafeiloai e le Palemia o lea Malo susuga Anthony Albanese o le taitai o le Malo o Samoa, na alo ai loa i talanoaga faavaomalo, ma e tele mataupu sa folasia ai, e pei o suiga o le tau ma fesoasoani mo Samoa mai lea Malo.
Sa talanoa ai foi taitai o Malo e lua i le polokalame o Visa nofomau a lea Malo ua faatulaga e manuia ai tagata o nisi o atunuu o le Pasefika e aofia ai ma Samoa.
Na afea foi i talanoaga taumafaiga mo le faaleleia o le tamaoaiga o atunuu e lua ona o aafiaga o le faamai Koviti-19.
I le aofaiga e tusa ma le 98,000 o tagata samoa ma ē e iai piitaga Samoa o loo alala i Ausetalia, ua amanaia e le Palemia o lea malo i feiloaiga ma le Palemia o Samoa le sao o i latou i soo se atinae i lea atunuu aemaise o taaloga, e pei o alo ma fanau i le aulakapi liki o le Toa Samoa.
O le faaiuga o lenei vaiaso e mae’a ai le asiasiga taualoa a le Palemia o le atunuu i lea Malo.
