O tagata o le afioaga o Fagalii ua ave iai le faamuamua mo galuega i le malaevaalele i Fagalii pe a toe tatala mo malaga a vaalele laiti, i le Aso Gafua o le vaiaso fou.
O se tasi lea o aiaiga o le maliega ua fausia i le va o alii ma faipule o le nuu, ma pulega o malaevaalele faapea le Matagaluega o galuega tetele a le Malo.
Ua faailoa i se pepa o faamatalaga mai le ofisa o le Minisita o Galuega Tetele, o vaalele sivili ma pulega o malaevaalele, o le Aso Gafua o le vaiaso nei na faataunuu ai le feiloaiga i le va o le afioaga ma le minisita le tofa Olo Afoa Fiti Vaai, sa faamautu ai le lagolago malosi ma le agaga fiafia o le nuu i le toe tatala ai o le malaevaalele.
O le feiloaiga lea sa faamautu ai nisi o faamanuiaga o le a maua e Fagalii e pei o le faafaigaluega o ona tagata i le malaevaalele, tuu iai nisi o galuega mo le vaaia ma le faaleleia o le malaevaalele, ma avanoa e siitia ai tupe maua mo ana pisinisi e pei o faleoloa ma taavale laiti laupasese o nisi ia o auaunaga tāua sa faafoe i le malaevaalele i tausaga ua mavae ae o le a toe faaauau.
Ua faaalia i le pepa o faamatalaga o le feiloaiga i le amataga o le vaiaso nei, na momoli ai le faafetai a le Afioga i le Minisita i le mamalu o le afioaga, i le Afifio o Alalatama (Fuamatu ma Fuamatu), Afifio Tuisugaletaua ma Luamanuvae, Afifio Gafa (Lealiiee ma Lealiiee); le Alalata’i o Pulemagafa ma le Faigā, ma i laua na Talia le Tanoa; aemaise le Susu o le Igaga o le Fale ma le Nofoituaiga ia Saleupolu.
E pei ona silafia e le atunuu ua faatolu ona tapunia lea malaevaalele ona o le itu i le saogalemu ma o le tapuniga mulimuli o le faaiuga o le masina o Tesema o le tausaga e 2019.
Peitai o se tasi lea o folafolaga a le faigamalo ua tu nei i le foe, e toe tatala lea malaevaalele pe a tulai mai, ona o le silasila i le tulaga vave ma faigofie mo malaga i le va ma Amerika Samoa, aemaise o le tu lata i le taulaga mo i latou e malaga mai Sasa’e mo fonotaga ma isi mataupu faavavave e lē umi ni aso i Samoa ae toe taliu i Amerika Samoa.
O loo iai le fuafuaga a le Malo e tatala le malaevaalele i Fagalii i le ta o le 2 o le aoauli o le Aso Gafua o le vaiaso o muamua nei le aso 29 o Me.
O le fono tele poo le Koneferenisi a le Ekalesia Metotisi i le masina o Iulai, e iai le talitonuga ua faafiafiaina usugafono mai Amerika Samoa a le ekalesia ona ua toe tatala le malaevaalele i Fagalii.
