O le sa’oloto o le aofa’iga o tagata e auai i potopotoga e pei o sauniga lotu ma faalavelave masani aemaise o faatasiga tetele, faapea le feoa’i i soo se taimi i fe’au ma galuega ma isi fuafuaga mai le itula o le ao e oo i le po, ua toe faaauau mo le isi fā vaiaso, ma le faamoemoe e toe iloilo le iai pea o Samoa i le laasaga muamua le Level One i le lanu moli, pe a oo atu i le aso 26 o le masina fou o Iulai.

O le faatumauina o puipuiga o le atunuu i le laasaga muamua na faailoa e le afioga i le Sui Palemia le afioga Tuala Tevaga Iosefo Ponifasio i sana saunoaga faalaua’itele i le Aso Lua 28 o Iuni, na mae’a ai le fā vaiaso muamua na see mai ai puipuiga o le faama’i mai le Laasaga 2 i le Laasaga 1, talu ona pesia le lautele o le atunuu i le faama’i i le aso 17 o Mati, ma ua silia ai nei ma le tolu masina talu ai.

Ua faailoa foi e le Sui Palemia le faaitiitia pea o le numera o tagata i le atunuu ua maua i le Koviti-19 peitai e faamalosia pea puipuiga masani, a o lumanai ai le masina o Aokuso o le a toe tatala ai tuaoi mo malaga masani ma afea ai foi Samoa e tagata malaga mai fafo. O aiaiga o le malaga mai o tagata i le atunuu i totonu o le fā vaiaso ua toe faaauau ai le laasaga muamua, e lē toe faanofoesea i le aiga.

O lona uiga e  taunuu loa i le malaevaalele sa’oloto e foi i aiga pe afai e lē maua i ni āuga o le faama’i, peitai e ao pea ona tausisia puipuiga i le faia o le puni fofoga, ma faia se su’ega poo se test i le mae’a o aso e lima. O pasese uma e aafia i le faama’i i le tuanai o le lima aso talu ona taunuu mai, e ao ona faanofoesea mo le fitu aso ma e tatau foi ona toe faia se isi su’ega i le aso lona fitu.