O lea foi ua toe tolopo le tatalaina o le supamaketi a le Countdown i Saute o Dunedin, e mafua lava i isumu.
Na toe maua le isi isumu ananafi i le taeao i totonu o le faleoloa ma o lea ua toe tuu atu ai e faatoa tatala i le Aso Faraile.
Talu mai le aso 10 o le masina lenei na tapunia ai le supamaketi o lea na faapea e tatala ananafi, peitai o le toe maua ai o le isi isumu i le taeao lava ananafi o lea ua toe tolopo ai.
Ae i nisi o lipoti o lea ua faamalosia le aufaigaluega e ave aso malolo poo aso livi a o faia galuega faamamā, o loo matuai teena e le pulega e tusa ma lipoti a le Herald ma le faamalamalamaga o lea o loo tuu atu iai le filifiliga e mafai ona faigaluega i totonu o le supamaketi lenei i Dunedin, faigaluega i se isi lava lala a le Countdown, ae a leai e mafai ona malolo e faaaogā ai aso livi.
E lē mafai ona tatala le faleoloa lenei i Saute o Dunedin seia vagana ua faamalieina le matagaluega o Primary Industries faapea le pulega o le supamaketi.
I lipoti lava mai supamaketi, na lipotia mai foi le maua o le lago i totonu o le moa ua uma ona faapepa i le PaknSave i Upper Hutt.
O le pepa moa lenei e faapea na faapepa lava i totonu o le faleoloa ma ua aveesea mai le fata e tusa ma faamaoniga mai le sooupu a le Foodstuffs.
E lē gata la o le Countdown i Dunedin lea o loo tapunia pea, ae o lea foi ua faia suesuega i le PaknSave lenei i Upper Hut, faapea ai ma le PaknSave i Lincoln Road i Aukilani lea foi na ta’ua mai ai isi isumu.
O le amataga o le masina lea foi na salalau mai ai ata video o le isumu na maua i totonu o le salaki o loo faatau i le Countdown i Kalaiesetete.
A o faasolo ai la suesuega, e lē o faigofie i tagata faatau e tusa ma finagalo faaalia i luga o le social media.
