O loo faaauau pea ona sue le alii pailate Kiwi na ave faapagota e le West Papua Liberation Movement poo le vaega o loo tutū malosi ma finauina le tutoatasi o Western New Guinea.
O Philip Mehrtens o loo galue o se pailate mo le kamupani vaalele a le Susi Airlines, ma e faapea na ave ai i le aso 7 o Fepuari.
O lea ua uma ona taulai i le itumalo o Nduga lea e masalomia na muamua ave ai, ae o lea ua agai i isi pitonuu ona ua silia ma le 36,000 square kilomita, e leai lava ma ni faailoilo e iloa ai a mea sa iai le alii pailate i nuu nei.
Ae i se ata video ua toe lipotia e le leitio a Niu Sila, o loo maua ai o loo faatonuina le alii pailate e na te faitauina faaupuga, e leai ni pailate mai isi atunuu e mafai ona galulue ma feoai agai atu i Highland Papua seia vagana ua tutoatasi Papua.
O le tala lata mai mai le ami a Papua, o loo faatali se tali atu a le malo o Niu Sila i feutanaiga e faatatau i le tatala mai o le alii pailate.
