O gasegase o nisi o le atunuu ua lē mafai ona togafiti i le auaunaga a le soifua mālōlōina i Samoa ma māfua ai ona ave i Niu Sila ma Initia e vaai ai se isi foma’i ma faia ai togafiti, o loo faaauau pea ma o se polokalame e lē taugofie.
E ui ina taugatā ae o loo ave pea le faamuamua a le malo i le soifua mālōlōina lelei o o tatou tagata e pei ona faailoa e le Sui Palemia nisi o gasegase e lata i le sefulu ua mae’a faamaonia e le Kapeneta le auina atu i fafo mo sa’iliga togafiti.
O le tasi lea o polokalame tau soifua mālōlōina a le malo ua siitia tupe ua fuafuaina e faagaioia ai i le tala autū o le tupe o le a soalaupule e le Palemene.
Mai le 6 miliona sa iai muamua ua faaluaina ma ua 12 miliona ua faatatau i le tala autū fou o le tupe mo togafitiga o gasegase i atunuu mamao.
