O le a faaauau pea ona faataunuu le fuafuaga o le travel bubble a Niu Sila ma le Atu Kuki lea ua fuafua mo le aso 14 o Ianuari. Ua faamautu mai lea tulaga e ui ile folafolaga a le malo na faailoa I le vaiaso nei o le a faatuai le tatalaina o tuaoi faavaomalo seia oo ile faaiuga o Fepuali.
Faamaonia mai ile aso e le pule sili o le Cook Islands Tourism Corporation Graeme West o le a faataunuu lava le fuafuaga e pei ona fuafuaina ile va ma Niu Sila. E leai se faanofoesea e faia i lalo o lea maliega ma ua faamaonia foi le siitia o le aofai o tagata ua faia bookings mo ia malaga.
I totonu lava ia o le atu Kuki o loo iai se vaega o loo tetee ile le faanofoesea o tagata malaga atu ile atunuu, fai mai a latou e le saogalemu lenei faatatau mo tagatanuu o le Atu Kuki. Fai mai West o le tausia o le soifua maloloina o le atunuu ma tagata asiasi atu, o le itu lea o loo ave iai le faamuamua.
E 96 pasene o tagata Cook Islands e tai 12 tausaga ma sili atu, ua maea ona faia uma tui puipui o le koviti ma o loo faagasolo foi ile taimi nei le faia o tui puipui faaopoopo poo boosters.
