O le amataga o lenei masina ua faimeaalofa atu ai le malo o Amerika e tauala atu i lana polokalame fesoasoani le USAID i le malo o Samoa e ala i ni tuipuipui o le Pfizer e fesoasoani i le faatinoga o tuipuipui a le atunuu.
E oo atu i le 45,630 tuipuipui ua faameaalofa atu e lea malo mo Samoa o se vaega o le latou una’i ina ia foai atu le 1.2 piliona o tuipuipui mo le atunuu.
Ta’ua e le Amepasa o le malo o Amerika i Samoa, Tom Udall “O se auaunaga faaauau mo le Pasefika e aofia ai ma Samoa ina ia mafai ona taulimaina e atunuu ia tuipuipui saogalemu ma le aogā auā le faatinoga o a latou polokalame mo le tuipuipui”.
E silia ma le $52 piliona tālā le telē o fesoasoani a lea malo mo atumotu e 12 o le Pasefika, ae le gata i lea na faimeaalofa foi Amerika i le 115 o atunuu o le lalolagi e ala lava i tuipuipui o le Koviti-19.
Mo Samoa lava ia o se fesoasoani tāua tele e tali atu ai i nisi o faafitauli e pei o le vave uma o tuipuipui mo le atunuu aemaise o tui mo fanau laiti.
