Ua faalauiloa le faaauau ai pea o le faigapaaga a le kamupani telefoni o le Vodafone Samoa ma le Lakapi Samoa e ala i le lagolagoina o le lakapi i Samoa.
E pei ona tapena ai le Manu Samoa 15 mo le Ipu a le Lalolagi i Farani, ua mautu ai le galulue faatasi o nei vaega e lua ina ia faafaileleina pea le taumafai a alo ma fanau o loo fai ma avefu’a a le atunuu i taaloga faavaomalo a le lalolagi.
Na faafetaia ai e le Pule Sili a le Lakapi Samoa, Faleomavaega Vincent Fepuleai le tuuina mai o le tau’au a le kamupani telefoni e lagolagoina ai taumafaiga mo alo ma fanau a le atunuu.
“E momoli le faafetai i le fesoasoani tele a le kamupani i polokalame lakapi o loo faagasolo i le tele o taimi.
“E le gata i polokalame ae o taamilosaga sa faagasolo i totonu o le atunuu sa tuuina mai lava le lagolago malosi.”
Na ta’ua e le Pule Sili a le Vodafone Samoa o Rana Bose o le agaga lea i le kamupani ina ia tuuina le fesoasoani mo le manuia o alo ma fanau i le taaloga o le lakapi.
“E tumau pea le loto fesoasoani a lenei kamupani ma galulue soosootau’au ma le Lakapi Samoa ina ia mafai ona faataunuu ma manuia taumafaiga a fanau a le atunuu.”
E tele nisi o polokalame faataatitia mo le atina’eina o le taaloga lakapi o loo fuafua e faataunuu e le gata i taamilosaga lakapi ae o polokalame masani o loo faalauiloa ai le lakapi i aoga i totonu o le atunuu.
