E le toe talia e le faamasinoga maualuga le toe tolopo o le iloiloga o le tagi a le sa avea ma Loia Sili ia Savalenoa Mareva Betham faasaga i le Palemia, Fiame Naomi Mataafa.

E $650,000 tala le tinoitupe o loo tagi ai Savalenoa e totogi atu e le tamaitai Palemia ia te ia, ona ua soli faavae ma solitulafono le faamalolo o ia mai lona tofiga i le masina o Setema 2021, ae lei ma’ea lana konekarate.

I taualumaga a le faamasinoga i le Aso Gafua na faailoa ai e le loia o loo tulai mo le itu tagi o Dr. Rodney Harrison e lei oo atu lava se faamatalaga tusitusia faatauto a le itu tetee e tali atu ai i le talosaga a le itu tagi.

Peitai na faailoa e le loia o loo tulai mo Fiame ia Taulapapa Brenda Heather Latu i le faamasinoga ua afua ona tuai le tuuina atu o faamatalaga faatauto a le itu tetee, ona sa malaga le tamaitai Palemiae auai i fonotaga i atunuu mamao.

Faailoa e Taualapapa i le faamasinoga o le a tuu atu faamatalaga tusitusia faatauto a le itu tetee i le isi 2 vaiaso e tali atu ai i le tagi a Savalenoa.

Ae na faailoa manino e Dr. Harrison afai ae oo atu i le aso e toe valaau ai le mataupu e lei tuu atu lava se tali a le itu tetee e pei ona latou taua o le a tapena loa sana talosaga i le faamasinoga maualuga e tapu ai le toe avea o Taulapapa ma loia a le itu tetee.

Taua e Dr. Harrison o le masina o Me o le 2021 na faaulu ai le tagi a Savalenoa i le faamasinoga o lona uiga sa tele lava le taimi na maua e le itu tetee e tali mai ai i le mataupu ma e leai lava se ‘alofaga o le tuai ona tuu mai o a latou faamatalaga tusitusia faatautō.

O le aso 13 o Mati ua tolopo e toe valaau ai lea mataupu e faamautu ai poo ua maea tuuina atu faamatalaga tusitusia faatauto a le itu tetee, ma faamautu ai se aso e iloilo ai loa e le faamasinoga maualuga lea mataupu.