O lea ua faailoa i fuafuaga tau tupe a le malo mo le valu masina o loo totoe o le tausaga faaletupe o loo faagasolo nei, le siitia o fesoasoani tau tupe mo faalapotopotoga tuma’oti ma nofoaga o loo tausia ai tamā ma tinā matutua.
O lea fesoasoani sa faamatuu atu ai vaegatupe i le aofa’iga e 2 tesimale 6 miliona ae i le tala faatatau o le tupe fou ua maoa’e le siitaga o ia fesoasoani tau seleni e pei ona faailoa e le Minisita o Tupe e 8 tesimale 97 miliona tālā.
O nofoaga o le Mapuifagalele i Upolu ma Mapuipulotu i Savaii o le a maua le ta’i selau afe tālā, ma o se fesoasoani a le malo e pei ona saunoa le Minisita o Tupe i lana folasaga i le Palemene, e amana’ia ai le sao o i latou o loo faia le galuega o le tausia o ia matua tausi.
E pei ona siilafia o ia nofoaga o loo pulea ma faafoe e le Ekalesia Katoliko i le tatou atunuu, ae e lē o faapito manū ia tasi i se ekalesia o loo tausia o latou tamā ma tinā matutua i ia nofoaga.
