Ua faailoa nei e le Ofisa o le Malo o Niu Sila i Apia, o fesootaiga faatekonolosi o le a faaaogā mo le tuuina atu o talosaga nofomau i le polokalame o le Quota scheme, pe a toe tatala i le amataga o le vaiaso fou, le aso 3 o Oketopa.
Ua aumai i se tulaga faalauaitele lea suiga i le faia o talosaga nofomau, ma aumai ai ma le fautuaga e faaaogā telefoni feaveai ma masini komepiuta, e faagaioia ai talosaga uma.
Ua manino mai la i lea faasilasilaga o le a le toe faaaogāina le faiga sa masani mai ai, o le agai i le ofisa o Niu Sila ma aumai pepa faatumu, ona toe lafo lea i le meli poo le tauaao sa’o i le ofisa pe a mae’a ona faia o lea tulaga.
E pu’e ata o pepa fanau, pepa faaipoipo, ma isi vaega e manaomia ai lea faiga, ona tuu lea i totonu o fesootaiga faatekonolosi ma lafo i le ofisa o Niu Sila. E valu masina le umi e faatali ai ona faia lea o le Se’i e iloa ai talosaga mai tagata taitoatasi ma aiga o le a faamanuiaina i le nofomau.
