O le filifiliga a tagata e mautinoa ai se sui tauva o le a manumalo mai i nofoa e 7 o le Palemene ua avanoa. O le finagalo lea o le taitai o le vaega faaupufai a le Faatuatua i le Atua Samoa ua Tasi ina ua tāpā sona finagalo e tali ai i se manatu a le Failautusi a le vaega faaupufai e Puipuia Aiā Tatau o Tagata le HRPP.
O le finagalo a le Failautusi a le HRPP le afioga Lealailepule Rimoni Aiafi e faapea “Afai ae manumalo uma le latou pātī i le toe maua uma o nofoa e 7 ua avanoa o le a iai se suiga o le Mālō i le masina o Tesema”. Na faailoa lea manatu a Lealailepule o auala o faasalalauga a le latou vaega faaupufai ina ua momoli atu le sui tauva o le itumalo Safata No.2 mo le palota laititi a lea itumalo faapalota.
Taua e le Failautusi “ A tatou Mālō i nofoa ia avanoa ia tatou te toe o i totonu e fai le malo o le tala moni lena, e leo faatamala foi tatou i mea nei ae galulue faatasi a ma nai itumalo. E faigata ia o finagalo o tagata aemaise a le mea lea o le palota e Leai sesi e lē fia Mālō”.
O le manatu a le Tamaitai Palemia Fiame Naomi Mataafa “O lea oute iloa ua iai foi le fuafuaga faataatitia ia a le Faatuatua i le Atua Samoa ua Tasi o le mea a e lelei ai e na’o le 7 itumalo e lē toatele tele”.
Ina ua fesiligia le tamaitai Palemia i se manatu o le HRPP e faapea e ono suia le Mālō pe a maea palota laiti tali Fiame “O le finagalo lava o le atunuu e fai ai le faaiuga, tatou manatua foi isi faaliga ma fai mai e 42 ia sei fai ia le faaiuga ana faapea e fai e matou ia faipule atonu e faigofie ona e fai i luga o le finagalo a tagata palota.”
O nofoa e 7 ua avanoa o le Palemene na manumalo uma ai le vaega a le HRPP lea ua totoe ai na’o le to’a 18 o latou sui faipule ua avea mai tua e agaia le Mālō.
