O le faaiuga o le vaiaso talu ai na potopoto uma ai i le afioaga o Vaimoso sui o le Itumalo faapalota o Faleata Nu.1 e faalauiloa a latou atinae eseese e ala i fua o faatoaga, fualaau’aina ma fualaau faisua, meataulima faapea figota o le sami.
Na faatumulia lea faamoemoe i le toatele o faifaatoaga faapea sui o le itumalo e molimauina a latou fua o a latou seleselega faapea a latou atinae eseese. E le gata i lea sa mafai ona auai atu iai nisi o sui mai motu o le Pasefika a le Matagaluega o Faatoaga ma Faigafaiva o loo i Samoa mo le fonotaga tele o loo ua faagasolo i le vaiaso nei.
O se avanoa na mafai ai ona silasila ma maimoa nei tagata mai atunuu o le Pasefika i atinae e mafai ona faatino e le au faifaatoaga a Samoa.
O le afioga i le Minisita o Faatoaga ma Faigafaiva, susuga i le Laaulialemalietoa Leuatea Polataivao Fosi Schmidt na saunoa i le lauga autu ma na ia faamamafa le tāua o nei atinae tau faatoaga faapea faigafaiva ma meataulima auā o vaega ia e tua iai le toatele o tagata o le atunuu mo tupe maua.
O le itumalo faapalota o Faleata Nu.1 ua faaopoopo atu i le tele o itumalo ua mae’a ona faalauiloa a latou uluai seleselega, ma o le lona lua ai lea o a latou faaaliga o le uluai seleselega.
O le itumalo faapalota o Faleata Nu.1 o loo avea ai le Fetalaiga Manuleleua Paletāsala Talitau Tovale ma o latou sui faipule i totonu o le Palemene o Samoa.
