O loo iai nei leoleo i le faaitu lea o North Shore o loo tulai mai ai se faalavelave fai mai o loo iai se alii o loo fealua’i ai ma se fana ma ua tapunia ai ma aoga e fa i le faaitu lea e lalata atu i le vaega o loo tupu ai le faalavelave.
O loo ta’ua i lipoti a le ZB o loo si’o e leoleo le fale ma faaaogā le sipika faaleoteleleo e fesootai ai ma le tagata o loo i totonu o le fale. O loo lipotia ai foi ma se isi faalavelave i se vaega e le mamao ese ma le nofoaga lea, o loo fetaua’ina ai le vaaia o se alii o loo faamanu’alia i le mae’a o tuliga ma leoleo, fai mai e leai se sootaga o faalavelave ia e lua ma o loo faagasolo uma iai suesuega a leoleo.
Ua iai isi lipoti lata mai ua faailoa mai ai ua toe matala aoga sa loka ona o le faalavelave ma faafetaia foi e leoleo le fesoasoani ane a pulega ma faiaoga ina ua tulai mai le faalavelave. O loo faaauau le suesuega a leoleo i mataupu uma ia e lua.
