E iai turisi asiasi mai i Niu Sila faatoa toe iloa mulimuli ane e matuai taugata lava le tau o visa na o latou totogia pe a faatusa i le tau sa’o e tatau ona iai.
O lea e lei mamao atu talu ona faafaigofie ona ulufale mai i Niu Sila tagata mai atunuu e iai Kanata faapea le malo tele o Amerika.
O le omai ai i Niu Sila e moomia le faatalosaga o New Zealand Electronic Travel Authority lea e tatau ona na o le $52 e aofia ai ma le Tourism Levy, peitai o lea na totogi e nisi le $214.
Sa saunoa ai le pule sili o le House of Travel, Brent Thomas i tala a le Newshub e lē fou lea tulaga ona e tele o upega tafailagi a pulega eseese e mafai ona faatalosagaina ai e ese mai le upega tafailagi autu a le Immigration.
Ua fai mai ai ma le Immigration a Niu Sila e moomia ai le siaki lelei o upega tafailagi o loo agai iai tagata mo pepa faatumu nei ma ia mautinoa o le upega tafailagi sa’o a le malo ae lē o se third party lea e iai foi ma a latou lava peimeni faaopoopo poo fees.
Na maua e tala fou e faapea foi le faatumuina o le ESTA poo le Electronic System for Travel Authorization lea e tatau ona faatumuina e tagata sitiseni Niu Sila e ulufale ai i Amerika, lea e na o le $21 tala Amerika i luga o le upega tafailagi a le vaega o tiute ae $200 ma ona tupu tala Amerika i isi upega tafailagi.
O le fautuaga ua tuuina mai ia fai lelei lau suesuega ma ia mautinoa o loo sa’o le upega tafailagi o loo e agai iai mo pepa faatumu faia online.
