E eseese finagalo faaalia o faatosaga i totonu o le atunuu e faatatau i le fesili pe tatau pea ona faatumau le poloa’iga o loo faamalosia ai tui o le Koviti.
Ta‘ua e lipoti a le leitio a Niu Sila o lea ua faamalosia latou e aua ne’i toe taliaina tina ma’itaga a o utiuti ai le aufaigaluega.
A o valaau ai le kolisi o faatosaga i le malo e toe iloilo faamaoniga o loo fua iai lana faai’uga o le faamalosia o tui mo faatosaga, e lē o lotogatasi faatosaga i se faai’uga e ioe pe leai.
O le masina o Me lea na tusi ai le kolisi i le minisita o le Koviti faapea le matagaluega a le soifua mālōlōina e faatalosagaina ai le faia o se iloiloga.
I lipoti ona o le utiuti o le aufaigaluega, o le to’atele e lē faapea o lagolagoina le leai o ni tui, peitai o loo maualuga le mana’o ia toe faafoi mai faatosaga e faia le galuega e tusa lava pe e le’i faia tui o le Koviti.
Ae mai faatosaga o loo leai, o le popolega o le aafiaga o tagata lautele mai le aufaigaluega e leai ni tui. Mai le sooupu o le vaega o le Koviti a le National, Chris Bishop ua ia toe faamamafa le talosaga ua tatau ona aveesea le poloa’iga o loo faamalosia ai tui o le aufaigaluega a le soifua mālōlōina.
I se tali mai le ofisa o le minisita o le Koviti, o nai vaiaso o i luma e tatau ona oo mai ai i minisita le iloiloga a le matagaluega o loo faia nei i poloa’iga lea o loo faamalosia ai tui o tagata galulue i le soifua mālōlōina.
