E iai i latou ua faaalia le misia ma lagona faafetai ona o le tautua a Jacinda Ardern, e iai foi nisi e ese manatu.
Talitonu o le taitai a le pati a Maori Debbie Ngarewa-Packer o se taitai e matagā osofaiga na ui ai faatasi ma lona aiga i totonu o le lua tausaga talu ai ma a o ia faafetaia ai le Palemia, o lona manao ia tulai mai se taitai Maori e taitaia le atunuu.
Mai lē sa avea ma Palemia o Niu Sila, Helen Clark e na te malamalama e le faigofie le avega e sau ma le tofiga Palemia ma o le tele o osofaiga na faia faasaga ia Jacinda Ardern i luga o le social media ua tatau ona faaaoga o se avanoa e toe iloilo ai polokiki ona i lana maitau e ono avea ia ma mafuaaga o le le fia manao o se isi i lea tofiga.
Na faafetaia ai foi e Clark le Palemia i lona sao ma lana taitaiga aemaise lona aiga.
E toatele sui o le Labour ua faailoa le agaga faafetai i luga o le social media i le taitaiga a le Palemia, ma o le finagalo foi lea o le minisita o tagata Pasefika, Aupito William Sio faapitoa i le manatu o le Palemia i tagata Pasefika i Aotearoa.
Ae mai ia Sir Collin Tukuitonga poo se tasi e le fou lona suafa i le finauina o se manuia i le itu tau le soifua maloloina o tagata Pasefika, o lona manao poo ai lava e tulai mai e suitulaga ia Jacinda Ardern ia faaauau ona faamuamua tagata Maori ma Pasefika.
Saunoa Tukuitonga o le faamavae mai o Jacinda ua o se matuai gau lea mo le komiuniti a le Pasefika.
Ae mai lē sa tamomoe faatasi mai ma Jacinda a o taitaia toalua ai e le NZ First ma le Labour le paeaiga faatoa uma atu, Winston Peters, e lei faamagaloina lava e Winston le pelogia o ia e Jacinda ma le Labour ma poo ā suiga ua iai nei e le toe fia galulue ma le Labour ma e le o faateia foi ia i le faamavaega ua iai nei.
