Ua mautū nei fausaga o tapenaga a le malo i le tuuina atu o le taui tupe e 10 miliona tālā i le itumalo o Safata e māfua mai i aafiaga o le si’osi’omaga o le gataifale o lea itumalo ona o le manuao o le Manawanui o loo goto i gataifale o Tafitoala.
Ua faailoa ai e le afioga i le Palemia ua pasia e le Kapeneta le amata tufaina o lea taui mo pisinisi ma tagata uma o le itumalo lea ua fuafua e lē i lalo ifo o le tasi le afe tālā le tupe e maua e le tagata e to’atasi e fua i le faitauaofa’i e 8 afe o tagata o loo alaala i Safata.
O Siumu ua faailoa e le Palemia e ese le aofa’iga o le seleni o le a latou maua i le taui lava ona o aafiaga o le gataifale mai le manuao, ma o le a totogi lava e le malo o Niu Sila le tusa ma le 4 miliona mo Siumu.
Ua atoa le tausaga ma le lima masina ua savalia nei talu ona tula’i mai le faalavelave na mu ai le manuao o le Manawanui ma goto i ogasami i Saute o le motu o Upolu, a o iai i Samoa mo sana su’esu’ega ma faatino ai foi galuega o le puipuiga mo le Tupu o Peletania sa faamautū i se faletalimalo i lea faaitu o Upolu a o iai i Samoa le Tupu o Salesa III ma lana masiofo i le tatalaina o le fono a Malo o le Taupulega ia Oketopa o le tausaga e 2024.
