E tuai lava ae fai mai, atonu o se muagagana lea ua sa’o tonu i se alii ua feta’ua’ina nei le tuuaia i le uta tele o le fualaau o le cocaine ma le aisa lea na aumaia i Ausetalia i le silia ma le 10 tausaga talu ai ae o lea faatoa faia nei moliaga.

O le alii Ausetalia lea e 42 tausaga na pueina i le malaevaalele i Sini i le aso 4 o Mati ina ua lele ane mai South East Asia lea e talitonu leoleo na lafi ai talu mai Aokuso 2012.

E talitonu leoleo o lenei alii sa ia teuina le 1 le kilo o le cocaine ma le 5kilo o le aisa i se safe house i Hong Kong a o lei galulue faatasi ai ma se kamupani courier e aumaia le uta i Ausetalia ia Iulai 2012.

Na maua e leoleo le $1.6 miliona o tupe i le taimi o le suesuega sa taulamua ai le AFP, leoleo a le setete o Niu Sa Uelese, le Border Force a Ausetalia ma le ofisa o le tiute a Hong Kong.

O le faasalaga aupito maualuga o mataupu faapea o le soloatoa i le falepuipui.

Fai mai leoleo ai na faapea lea alii a umi na nofo ese mo sina taimi ona galo ai lea o lana solitulafono peitai e matuai sese lava lea mau.