Ua mamafa tele le faasalaga a le faamasinoga faasaga i le alii sa faasalalau i le leitio Nate Nauer, ma ua fai mai lana loia o le a ia toe apiliina le faaiuga na tuuina mai ananafi.
E 2 tausaga ma le 9 masina lea ua aumai e le faamasinoga faaitumalo i Aukilani e nofosala ai Nate Nauer i le toese ina ua faamaonia moliaga o le faaaoga o tupe maua mai auala eleelea poo le faatauina lea o fualaau faasāina i se auala e nanā ai.
E $420,000 lea na faaaoga e Nauer mo le kegi a le Comancheros ma sa ia faatauina ai taavale anagata, ma o lea foi ua ioeina e Nauer ona moliaga nei.
E le na o Nauer na lau ananafi lona iuga o lea e foi na faatasi ai ma Yonghao Huang o se tagata faatau taavale ma Vetekina Naufahu poo le uso o le peresetene o le kegi i Niu Sila nei.
E silia ma le 4 tausaga o suesue mai le mataupu o loo molia ai Nauer ae o lea faatoa faalauiloa faalauaitele lona tagata ananafi.
O Nauer o se tasi sa faasalalau i le Mai FM i le Mai Morning mo le silia ma le 10 tausaga.
Ae mai le loia o loo tu mo Nauer, Ron Mansfield o lea sa finau ia faasala Nauer i le fale ae le o le alu i le falepuipui, ma e faapea le alii o Naufahu.
O loo lagolagoina foi e Dave Letele le manao o le loia poo lē e ana le BBM Motivation lea ua tolu tausaga o galue volunteer ai le alii o Nauer.
