Ua malilie faiaoga o aoga tulagalua e tetee faatasi ma isi faiaoga o le atunuu i le Aso Tofi o le vaiaso a sau, 16 o Mati.
O le imeli mai le iuni a le New Zealand Educational Institute i le afiafi ananafi na faamautinoa ai le iuga ua iai nei, ma o lona uiga o le a solo tetee ai le tusa ma le 50,000 o i latou i le vaiaso fou.
O se aso foi ua mae’a faatulaga ai solo tetee i le tele o vaega o le atunuu, e pei ona ua mautinoa ai nei le faatasiga ua fuafua e faamaopoopo i le Palemene mo i latou o loo i Ueligitone, a o Aukilani o le a savavali mai Queen Street ma faatasitasi ai i Aotea Square.
O se faaiuga ua oo iai a o teena ai le ofo mai le malo, ma ua fai mai ai faiaoga e le o lava.
O le faaiuga a faiaoga o aoga tulagalua e auai i le tetee i le Aso Tofi o le vaiaso a sau, o le a savavali faatasi ai ma faiaoga o aoga maualuluga lea lava e lei ausia se maliega i feutanaiga e faatatau i totogi talu mai Me o le tausaga talu ai.
A o lē faigofie ai i faiaoga le mataupu o loo finauina ai pea le malo i o latou totogi, ae o se aso foi o le a misi ai aoga a fanau faapea mātua i le tau fetuunai o nisi e vaaia fanau i lea aso.
