O le fuafuaga a le Malo e faia se sailiiliga poo le Forensic Audit, i le tulaga sa faatino ai le faagaioia o nisi atiina’e a le Malo i tausaga e 40 ua tuana’i a’o tu le faigamalo a le vaega e puipuia aiātatau a tagata, ua matuā lagolagoina ma talia e se tasi o tamalii sa avea ma Pule o le Faleoloa o Faato’ga a le Malo, ma toe avea foi ma Pule o le faalapotopotoga o le NPF i tausaga ua mavae, le susuga Papalii Panoa Tavita Moala.

I se feiloaiga ma le autusitala i le vaiaso nei na faailoa ai e lea tamalii ni tuua’iga faasaga i lē sa avea ma Palemia mo le 20 ma ona tupu tausaga talu ai le susuga Tuilaepa L Sailele Malielegaoi, e tali ai i ni tuua’iga a Tuilaepa ia te ia ae na faaalia e Papalii e lē moni ia tuua’iga e pei o le gau o le NPF a o avea ma Pule Sili.

O le tuua’iga a Papalii i le 15 eka o fanua o le NPF i Aleisa sa fai atu ai Tuilaepa ia te ia a o pule i lea faalapotopotoga a le Malo, e avatu e fai ai faailoga o le lulu a le latou aulotu Katoliko i Siusega i se vaitau o le tausaga e 2005, e lei mafai ona tuuina mai e Papalii ni faamaumauga e lagolago ai lea tulaga peitai o lana saunoaga mai e tatau ona maua i le NPF. Faaalia e Papalii Tavita Moala o le taitaifono ma le komiti faafoe a le NPF i lea vaitaimi na taliaina le manao o Tuilaepa a o Palemia, ma na te lē iloa po ua mae’a ona totogi atu e le aulotu i le NPF le tau o le 15 eka.

Sa fesiligia lea tamalii pe aisea ua ia faato’ā faailoa ai lea mataupu, i le tuanai o le 15 tausaga talu ona ia tuua le tulaga Pule o le faalapotopotoga o faaputugatupe o le lumanai manuia o tagata Samoa le NPF.