Fai mai Dr Shane Reti o le National, e tatau i le matagaluega a le soifua maloloina ona faailoa faaiuga o le suesuega na faia lea ua toe liki mai i tua nisi o tala e le o lava le aufaigaluega i Counties Manukau.
O le vaiaso talu ai na toe liki mai ai i tua e na o le 19% o le aufaigaluega e talitonu o loo lava meafaigaluega, paketi faapea le aufaigaluega e mafai ona tatalia le sulu atu o gasegase i le Emergency Department a le falemai i Middlemore.
E ese mai ia Middlemore, o Aukilani i Saute e na o le 33%.
O le manaoga o le sui o le National, o le faalauiloa o faaiuga o suesuega o le a fesoasoani lea i le sailiga o se fofo o le faafitauli, ae le gata i lea o le tali atu i lagona o le aufaigaluega e le o lava le lagolago o loo tuuina atu e faatino la latou pitolaau.
Peitai e ui i le manao o Reti ua tali mai le soifua maloloina e le mafai ona faailoa, ona o le popolega e lē malu ai le aufaigaluega aemaise o isi suesuega i le lumanai ma o le suesuega foi sa fai e mo na o le aufaigaluega lava.
Ae na ta’ua e le minisita o le soifua maloloina Dr Ayesha Verrall, o loo iai lona manao ia faia e le matagaluega se gaioiga e tali atu ai i faaiuga o suesuega na faia ma o le malo foi o lana faamuamua o loo ave lea i le toagaogao o le aufaigaluega.
