O le talosagaina o le sitiseni Niu Sila o tagatānuu o Samoa na soifua mai i le va o le aso 13 o Me o le tausaga e 1924 ma le aso muamua o Ianuari o le tausaga e 1949 na amata faagasolo i le Aso Lua na te’a nei ina ua mae’a sainia e le Kovana Sili o le malo o Niu Sila le tulafono taufaaofi o le sitiseni o tagata Samoa na soifua mai i ia tausaga.
Ua iai le talitonuga a itiiti mai e 3,500 tagatānuu o Samoa e agavaa iai.
O le Aso Faraile na te’a nei i Aukilani i Niu Sila na faia ai se sauniga faafetai e nisi sa finauina le sitiseni o tagata Samoa e agavaa, ma sa valaau faaaloalo ai i le ta’ita’i o le malo ma nisi o lana Kapeneta sa i Aukilani i le faai’uga o le vaiaso, peitai na faailoa i le taimi o le sauniga lotu faafetai e se sui o le aulagolago i le finauina o le sitiseni Samoa na savalia le tamaitai Palemia, e lē o talia e le ta’ita’i o le malo Samoa le toe faafoi o le sitiseni o tagata Samoa e agavaa.
O le asofanau ma le posiva a le vaega faaupufai o le faatuatua i le Atua Samoa ua tasi i le Aso Toonai le faai’uga lava o le vaiaso na te’a nei, na saunoa ai le ta’ita’ifono o le vaega faaupufai ma ia faailoa e lē sa’o lea faaaliga.
O se vaega lenei o ia saunoaga mai le afioga Fepuleai Semi o se tasi o le mau sa toe finauina le sitiseni ma le susuga Laaulialemalietoa Leuatea Polataivao Fosi Schmidt o le ta’ita’ifono o le vaega faaupufai o le Faatuatua i le Atua Samoa ua Tasi.
Ni vaega o saunoaga mai le afioga Fepuleai Semi ma le susuga Laaulialemalietoa Leuatea Polataivao Fosi Schmidt.
