E lē o talia e Fepuleai Atilla Ropati le poloaiga na tuuina atu i ai e le afioga i le Tamaitai Palemia, ina ia faamuta mai lona tofiga o le Peresetene o le Faamasinoga o Fanua ma Suafa i le aso a taeao, Aso Gafua 31 Oketopa 2022.
O le Aso Sa, aso 30 Oketopa na faasoa solo ai i luga o fesootaiga televavave o le facebook se pepa o faamatalaga (press release) o loo faailoa ai le tali faalauaitele a le afioga i le peresetene o le Faamasinoga o Fanua ma Suafa, Fepuleai Atilla Ropati e tali fuaitau atu ai i le tusi mai le afioga i le Tamaitai Palemia o Samoa, e faailoa ane ai le faaiuga ua faaiugafonoina e le Kapeneta ina ia faamuta loa lana auaunaga o le tofiga Peresetene o le Faamasinoga o Fanua ma Suafa a Samoa.
O le tali fuaitau a le afioga Atilla e tusa o le tusi mai le Tamaitai Palemia, na ia ta’ua ai o le tusi mai le Palemia o loo aiaia ai le veaga 67(6) o le Tulafono o Fanua ma Suafa 2020. O le manatu o Atilla, o le faaaogaina o lenei vaega 67(6) o le tulafono e faamuta ai lona tofiga, ua lē o ogatusa ma le Faavae, lea o loo ta’ua ai e na o le Ao o le Malo o loo iai le malosiaga e mafai ai ona ia faamutaina pe aveeseea le tofiga o le Peresetene o le Faamasinoga o Fanua ma Suafa (LTC), faatasi ai ma le vaega o le 2/3 o le Fono Aoao a le Palemene, peitai e le o le tulaga lena na faatinoina.
Na ta’ua foi i le tusi a Fepuleai Atilla, o le isi mafuaaga (ground) e mafai ai ona aveesea le tofiga o le Peresetene, pe afai ua lē taulau ona ia faatinoina ona tiute o le Peresetene o Faamasinoga o Fanua ma Suafa, peitai e lei ta’ua atu lena mafuaaga i le tusi atu a le afioga i le Tamaitai Palemia ia te ia e tusa ai ma le faamutaina o lona tofiga.
O le isi mafuaaga e pei ona ta’ua i le pepa o faamatalaga, i le mataupu i le Faamasinoga Maualuga o le President of the Land and Titles Court v. Attorney General [2022] WSSC 8 (14 Aperila 2022) na talanoaina ai le vaega 67(6) ma faaiuina ai e faapea, o le aveesea (summary removal) o faamasino o le Faamasinoga o Fanua ma Suafa e aunoa ma le faagasologa ua faatulaga e le mafai ona faamalieina ai lena faaiuga. Peitai e talitonu Atilla, o lea ua aveesea o ia e aunoa ma le faatinoina o lena faagasologa.
Ona o na mafuaaga na ta’ua, na faailoa ai e Fepuleai, ua tuuina atu nei sana lu’i faaletulafono i le Faamasinoga Sili ina ia iloiloina ai poo ogatusa ma le tulafono le faaiuga a le afioga i le Tamaitai Palemia e faamuta ai lona tofiga.
