E foliga mai e faataunuu lava se isi fusuaga e toe faia i le va o Lupesoliai Laauli Joseph Parker ma Zhilei Zhang o Saina.
Sa faailo e le pulega a Zhang, ua naunau e amataina talanoaga o le feagaiga mo le isi fusuaga e faia.
Sa faatoilalo e Parker ia Zhang iai i Riyadh i Saudi Arabia i le faaiuga o le vaiaso, ma faapaleina ai i le siamupini o le lalolagi a le WBO-WBO Interim Heavyweight Champion.
O le lua ai lea o faia’ina i le taleni fusu a lea tama Saina e 40 tausaga, e pei ona sa ia faailoaina, o Parker o se tama sa sili atu lona lelei i le po o le la fusuaga, ae o le a la toe feiloai i se taimi vave, e pei ona sa ia faaalia ai i le televise a le Sky Sport.
Faaalia e Zhang, o le a toe alu e toe faavasega mea uma, ma o se toa moni e lē alu ai pea faapea, ae o le a toe taliu mai.
O se tasi o lea faavasegana, o le a tilotilo ai i le faapefea ia Parker ona ia maua lea manumalo, e ui lava e faalua ona palasi i lalo.
O le tali e mautinoa, o le tulaga lea i le lē lava o lona malosi, i le faaumiumi lava o taamilosaga, o le atili pisi foi lena o Parker, ae e foliga mai e vave ona uma le penisini a Zhang.
Sa faaalia ai e Parker, sa faaono mafai lava ona ia fusu mo le 20 taamilosaga, ae sa tatau ia te ia ona fusu atamai, vaai i taimi e togi ai ana tu’i.
Ae i le so’a o Zhang, e lei ioeina e Terry Lane o le lē lava o le malosi o lana tama le pogai o le faia’ina.
Ae sa ia tuuaia Parker i le fusu pii ma le taofiofi, sa lē mafai ai e lana tama ona faaauau lana alafusu.
Ae peitai o se isi fusuaga e faia i le va o Parker ma Zhang, e faaono faatali pe o le masina o Setema poo Oketopa.
