Ua lipotia le taumafai o le vaega faaupufai a le Leipa i Niu Sa Uelese ia tau tuuitiitia le faaaogaina o telefoni smartphones i aoga maualuluga lautele public high schools i lalo o se taumafaiga fou ua o latou faailo.

O loo taua i le 7news afai ae tulai mai le faigamalo a le Leipa i le isi palota i le tausaga fou ona faatino lea o le faatatauga lea.

Fai mai le taitai o le vaega faaupufai, Chris Minns e fia faaitiitia le faaaogaina o telefoni i potu aoga ina ia faaleleia ai tulaga tau aoaoga ma le faalautele o le silafia.

Fai mai a ia, o ia o se matua ma e popole i aafiaga o telefoni ma isi masini faaonaponei i le fanau ma o le ala lea ua faatino ai lea fuafuaga ona e taua tele.

Ua taua foi i le lipoti o le a faia se iloiloga i aafiaga o faiga faatekonolosi i tamaiti ma tagata talavou.

O lona uiga la o lalo o lea taumafaiga fou pe a faataunuu o le a manaomia ai ona tape telefoni a tamaiti aoga i le taimi o aoga ma aveesea sei mae’a lelei le aso aoga.