“E matuā lē faamaonia nei faamatalaga ma e leai lava ma se tulaga faapena na alia’e mai”…Fofoga Fetalai

December 4, 2024
Samoa
Tusia: Galumalemana Autagavaia Tipi Autagavaia

Ua tutumau le pulega o le nusipepa o le Samoa Observer i lana lipoti na faasalalau ai le taofia faamalosi i le malaevaalele i Aukilani o le Fofoga Fetalai ma le Minisita o Faamasinoga, ae o se pepa o faamatalaga ua faailoa ai le teena malosi e le afioga i le Fofoga Fetalai o le Palemene susuga Papalii Li’o Oloipola Taeu Masipa’u o le lipoti a le nusipepa sa agiga ai i le Aso Gafua o le vaiaso nei.

O loo faailoa i le lipoti e faapea e lei faia le siaki o le puipuiga o le saogalemu poo le security check a le Fofoga Fetalai ma le Minisita o Faamasinoga, ma nisi tagata e to’alua sa aofia i le pasese a se malaga a le kamupani vaalele o le Air New Zealand i le aoauli o le Aso Tofi na te’a nei.

O le vaega e faae’e ma faatali ai pasese o tagata faaaloalogia ma taualoa poo le VIP na faaaogā e le Fofoga Fetalai ma le Minisita ma ia pasese e to’alua e aga’i ai i le vaalele.

Na faato’ā fesiligia le Fofoga Fetalai ma le Minisita ma ia pasese e to’alua ina ua taunuu, ma o loo faaalia i le lipoti a le nusipepa sa ioe pasese e to’alua e lei faia a la siaki o le puipuiga ae o le Fofoga Fetalai ma le Minisita sa la tali atu i le vaega o le puipuiga o le malaevaalele i Aukilani ua mae’a ona fai a la siaki o le puipuiga.

Na taofia faamalosi ai loa le Minisita ma le Fofoga Fetalai ma toe faataga e tuua le malaevaalele mulimuli ane ai, e pei ona ta’ua i le lipoti.

O ia vaega uma na lipotia e le nusipepa ua faaalia e le Fofoga Fetalai i le pepa o faamatalaga, e matuā lē faamaonia ma e leai se tulaga faapea na tupu.

Ua tuua’ia ai e le Fofoga Fetalai le lipoti i le pitotasi ona ua lē tāpā pe fesiligia o ia ma le Minisita i so la finagalo.

Faaalia e Papalii Li’o Oloipola Ta’eu Masipa’u o le lipoti a le nusipepa o se gaioiga ua ta’u faamaualaloina ma faalumaluma ai i lona tofiga o le Fofoga Fetalai faapea le Minisita o le Kapeneta.

O le faigamalaga a le Fofoga Fetalai ma le Minisita sa auai atu i le faamanatuina o le 4 tausaga o le aso fanau o le vaega faaupufai o le Faatuatua i le Atua Samoa ua Tasi sa faia i Aukilani i le faai’uga o le vaiaso na te’a nei.