E fai lava si malosi o le afa o Gabrielle o loo faatali e agai mai.
O lea o loo i le vaega lua poo le category 2 le faatulagana o le afa I le taimi nei, ma o loo faamoemoe e suia agai i le category 3 i le taeao nei ona o lona malosi tele.
I lapataiga lata mai i le taeao nei o le itu i matu o le North Island lea ua lapatai e tapena mo timuga mamafa faapea savili malolosi. O Aukilani foi ma Coromandel ua toe faaopoopo aso o a laua state of emergency poo poloaiga o faalavelave faafuasei.
Mai le ofisa o le vaaitau o Gabrielle o se tasi lea o afa e malosi tele o le a afea Niu Sila, ma o le Aso Sa faasolo atu i le Aso Gafua lea e foliga mai e matuai lagona ai lona malosi seia oo atu i le Aso Lua.
O le alamatagi o loo iai i le taimi nei e tusa ma ripoti a le ofisa vaaitau, e muamua mai i le itu i sasae o Northland, faasolo mai ai i Aukilani, mulimuli ai Hawke’s Bay.
Ao foliga mai ai o loo lagi lelei lenei taeao, o le fautuaga ua tuuina mai faaaoga aso o totoe e tapena ai ma sauniuni e le gata i meaai, vai taumafa, eletise aemaise le mautinoa ua iai se fuafuaga ina nei te’i ua moomia le agai ese ao la ua maea tapena, ma o tapenaga e faaleoleo mo le tolu aso lea o loo fautuaina.
