E lei talosaga le pulega a le Punialavaa i le faigamalo a Samoa poo le Komiti o Tapenaga o le Tutoatasi mo se $50,000 e totogi ane mo a latou faafiafiaga sa faia i Samoa i le faamanatuina o le 60 Tausaga o le Tutoatasi o le atunuu.
E le o le malo poo le Komiti o Tapenaga o le Tutoatasi na avatua le faaili a le Punialavaa e faafiafia i Samoa i le faamanatuina o le Tutoatasi.
O le fesiligia ai e le taitai o le Itu agai o le vaega tupe na foai e le Malo i le kamupani telefoni o le Digicel Samoa mo le tapenaina o le malaga atu a le aufaipese ta’uta’ua a le Punialavaa e faafiafia i le faamanatuina o le 60 tausaga o le Malo Tutoatasi o Samoa e pei ona faatino ai le tele o faafiafiaga i le masina o Setema talu ai nei, ua tele ai foi manatu lagalagā o tagata o le atunuu, ua soona felafoa’i solo i luga o fesootaiga televavave le social media.
O le lomiga a le Samoa Observer i le vaiaso talu ai (21 October 2022) na iai le tusitusiga i le gagana Peretania, “$50K payment to Punialava’a Band questioned.”
O loo ta’ua i lea tusitusiga ni manatu na saunoa i ai le taitai o le Itu agai i se feiloaiga ma nisi o le autusitala a le atunuu, e peiseai ua faaseā i le telē o lea vaega tupe na faamatuu atu mo se kulupu poo se aufaafiafia e tasi.
O le manatu o le sui faipule ua faatea nei mai le Palemene mo le 24 masina e pei ona ta’ua i le tusitusiga a le SO, sa lei fetaui le totogi atu o lena tupe tele, ma ia ta’ua ai aafiaga faaletagata poo aiā feteena’i (conflict of interest) o le vavalalata o faiā a le aiga e ana le faaili ma le afioga i le tamaitai Palemia, Fiame Naomi Mataafa.
O saunoaga a Tuilaepa na ia ta’ua ai sa tatau i le malo ona fuafua lana faaalu o tupe ia le sili atu (overspend) nai lo le aofaiga ua mae’a ona faatulaga e faaalu mo tapenaga o le faamanatuina o le 60 tausaga o le Tutoatasi mo le tausaga atoa e pei ona faatulaga ai e le malo.
O tulaga masani lava i tapenaga faapea, e iai se vaegatupe patino e faatulaga ese mo fuafuaga uma, peitai o le ta’ua i le tusitusiga o se manatu patino e faasino i ni sootaga tau faiā e peiseai o le auala lea ua faigofie ai ona faamatuu atu lenei vaega tupe tele mo le faa’ili a le Punialavaa, na taumafai ai le sui o le Radio Samoa e saili atu ni finagalo o nisi o i latou sa fitoitonu ma iai se silafia i lenei mataupu aemaise o le faatinoina o le foai tupe na faamatuu atu e le malo.
Sa maua se talanoaga ma le afioga i le Minisita o Tagata Tafafao Maimoa o lana matagaluega tonu sa nafa ma le tapenaga o faafiafiaga eseese o le Tutoatasi, ma na fesiligia ai le afioga Toeolesulusulu Cedric Shuster mo sona finagalo i lenei mataupu.
Na saunoa Toeolesulusulu, o le malaga atu a le Punialavaa i Samoa, sa faamaopoopo uma ma tapena e le Digicel ma le Lava Hotel, o ni tapenapenaga a nei foi kamupani mo so latou sao i le faamanatuina o lenei aso tāua mo Samoa, lona uiga o le Lava Hotel sa faia le latou konekarate ma le Punialavaa ae lē o le Malo poo le Komiti o Tapenaga o le Tutoatasi.
O le pule o le Lava Hotel, o promoters o le koneseti a le Punialavaa, na tusi atu i le komiti o le tutoatasi ma faatalosagaina ai lea aofaiga o se seleni mai le tupe ua uma ona faatulaga e le Malo e mafai ona apalai atu i ai soo se faalapotopotoga mo ni tapenaga o ni a latou events e sootaga uma i le faamanatuina o le 60 tausaga o le Tutoatasi o Samoa.
Ma o le tuutuuga o le taliaina e le malo o le faatalosaga a le Lava Hotel mo le seleni e faatino ai ana tapenaga mo le auina atu o le Punialavaa i Samoa e faafiafia i le taimi o le Tutoatasi, o le a faatulaga se faafiafiaga tele a le faaili e faia i tuamaota o le Maota o le Malo i Matagialalua, ma o lena faafiafiaga o le a leai se totogi mo le maimoaina e le mamalu o le atunuu.
Na saunoa atili Toeolesulusulu o le tiute a le malo aemaise le komiti mo tapenaga o le tutoatasi, o le tali atu i le faatalosaga a le alii pule o le Lava Hotel, Pepe Christian Fruean mo se fesoasoani tupe ia latou tapenaga, e pei lava foi ona tali atu i faatalosaga tau seleni a isi foi faalapotopotoga, ae leai se sootaga a le Malo ma le faaili e tusa ai o lana malaga atu i Samoa, e pei ona atagia mai i saunoaga a le susuga Tuilaepa.
Mo le faaaogāina la o le seleni na faamatuu ane i le Lava Hotel e tusa o le faatalosaga na tuuina atu, o le mea lena e patino i le kamupani na faamaopoopoina le malaga a le Punialavaa i vaega uma na faaalu ai le seleni, ae pei lava ona molimauina, o se faamoemoe na matuā lelei tapena i taimi uma na faafiafia ai lenei faaili lauiloa a Samoa, ma o mea uma foi sa faaaogā o ni mea e anagata ma e le taugofie pe a fua i tau o mea i nei aso.
Na faamautinoa mai foi e le afioga i le minisita, e na te le o mautinoa foi pe na iai se tinoitupe na maua e le faaili mai le agent na tapenaina le malaga atu a le faaili i Samoa, o le mea lena e ono maua mai se faamaninoga mai le alii pule o le Lava Hotel, afioga Pepe Christian Fruean.
Sa saili se faatalanoaga ma le alii pule o le Lava Hotel i le aso ananafi, ae lei maua atu i le telefoni. Na tuu ai le feau i le aufaigaluega, peitai e oo mai i le taimi e lomia ai lenei tusitusiga, e lei maua mai se sootaga ma le alii pule.
Ae na maua le avanoa e faatalanoa ai nisi o sui o le faaili o loo ogatotonu i lenei faaseā a le taitai o le Itu agai, ma talanoa atu ai i le faletua o le susuga i le Faafeagaiga e onaina le faaili a le Punialavaa, Rev Lale Peteru, le faletua ia Vini Peteru faapea se tasi o la alo, le afioga Nanai Viellani Peteru.
Na faamautinoa mai e le afioga Nanai, o le latou konekarate na fai ma le Lava Hotel, ae leai se latou konekarate ma le komiti o tapenaga o le tutoatasi; lona uiga e lei totogia mai e le malo poo le komiti o tapenaga se $50,000 i le Punialavaa auā e lei faatalosagaina foi e le Punialavaa le malo mo se seleni.
Na faatalosaga mai le Lava Hotel mo se latou avanoa e malaga atu ai i Samoa e faafiafia i le vaitaimi o faamanatuga o le Tutoatasi, ma e pau lena o le latou faafiafiaga na te iloa na totogi ai latou e le Lava Hotel, o le afiafi o le corporate dinner sa tapena e le Lava Hotel, lea na faafiafia ai le Punialavaa.
O isi faafiafiaga uma a le faaili sa fai i Upolu ma le lua i Salafai, e leai se tupe na totogia e tagata na maimoa ai. Se’i vagana faleie ma le sound system ma moli ma isi tapenaga uma o le fata faafiafia, ma na saunoa Nanai e leai sona iloa poo ai tonu na totogia na mea sa faaaogā.
Na saunoa le faletua ia Vini, “Ina ua matou maua le tala i le tusitusiga a le nusipepa ma ni lafoga a le taitai o le Itu agai, na lagona le faanoanoa. Peitai, e le faagaeetia ai i matou i nei mea…
“E tasi lava le agaga na naunau ai le Punialavaa ia auai atu i Samoa ma talia fiafia ai le valaaulia a le Lava Hotel, ina ia auai faatasi ma le atunuu pele i lona aso faamanatu. Ma sa matou pepese ma le loto fiafia ma le agaga o le celebration;
“Pe maua ai se matou tupe pe leai, ae o le mea na tumutumu i o ma loto ma le Faifeau ma le ma fanau, le aiga Punialavaa, ia faia so matou sao i le faamanatuina o le 60 tausaga talu ona tutoatasi si o tatou malo o Samoa.”
