Ua faitau eseese se finagalo o le Minisita o loo iai le vaaiga o le poloketi tasi le miliona tala, le tofa Lagaaia Ti’aituau Tufuga, ma se finagalo o le sui faipule o le itumalo faapalota o Faasaleleaga 2 le afioga Magele Sekati Fiaui, i le mataupu i le vaegatupe e $175 afe tālā sa fesiligia e le Komiti Faafoe o le poloketi lona faaaogāina, mai le tufatufaga o le miliona tala muamua.
Sa faailoa e le minisita ina ua fesiligia i le taimi na mālōlō ai le fono a le Palemene i le Aso Lua, ua toe faamatuu vaegatupe o le poloketi mo lea itumalo ina ua mae’a ona toe faaola atu e le ta’ita’ifono ma le Fono Faavae a Faasaleleaga 2 lea vaegatupe sa fesiligia.
Peitai ua faailoa e le sui faipule ina ua fesoota’i mai, e leai se tupe na toe totogiina e ia ma le Fono Faavae.
Faaalia e le afioga Magele Sekati Fiaui ua faamalieina le Komiti Faafoe i le lipoti a le su’etusi sa tuuina atu ua faamatala ai le faaaogāina o le 175 afe lea sa faaaogā i alauni o le komiti o le Fono Faavae ma le aufaigaluega faapea le lotoifale o le ofisa o le Fono Faavae.
O le faamalieina o le Komiti Faafoe i le lipoti sa tuuina atu iai ua faamuta ai ma le fesiligia o le faaaogāina o lea seleni mai le miliona tālā muamua.
O isi vaegatupe o le miliona tala lona lua sa faamatuuina atu e aunoa ma se faaletonu.
