E lei talitonu le alii lea na ia tatuiina si loomatua o Maria Brown ma maliu ai lava i lona fale i Onehunga i le tausaga talu ai, o si ona lava tina lea na ia tatui ma faaooina iai le oti.
O le alii o Matamua Leatio’o, ua 50 ona tausaga, na tulai i luma o le Faamasisnoga Maualuga i Aukilani i le Aso Lulu talu ai, lea na faailoa mai ai e le faamasino Justice Sally Fitzgerald ua lē faamaonia le moliaga o le fasioti tagata faamoemoeina na molia ai Leatio’o i luga o mafuaaga e lē o lelei lona mafaufau, insanity.
Na ta’ua e le faamasino, o Leatio’o lava na faaoo le oti i lona tina, ae ua lē mafai ona faamaonia ai o se solitulafono lana gaioiga na faatino, ona sa lei sagatonu lona mafaufau i le taimi na ia faatino ai lea gaioiga.
Sa muai molia Leatio’o i le moliaga o le fasioti tagata faamoemoeina, ina ua maua le tino maliu o Maria Brown e se tasi o ona grandson i le aso 6 o Iuni, 2022, o le aso tonu lea o lona asofanau.
I se lipoti a le Stuff o loo ta’ua ai se faamatalaga a le faamasino e faapea, o le aso lea na pue ai e leoleo le alii o Leatio’o, sa ia ta’ua soo ai lava e faapea sa ia faia se galuega mo le tamaitai Palemia i lena vaitaimi, ma sa ia ta’ua ai foi o le tamaitai Palemia o le tina lea o lana fanau.
Na tutusa faaiuga a ni fomai tomai se toalua ua lava lo la silafia i gasegase o le mafaufau, e faapea, o le taimi na fasioti ai e Leatio’o lona tina, sa afaina ona lagona ma le mafaufau i le ituaiga faafitauli lea e ta’ua i le faaperetania o le psychosis, e mafua mai ituaiga lagona e peiseai o loo faalogo i ni leo, schizophrenia.
Foliga mai o se gasegase ua leva ona aafia ai lenei alii, ma e tele ana aga ia na aliali mai ua mautinoa ai e foma’i na aafia lona mafaufau i ni talitonuga ua femoumoua’i ma ua lē sagatonu i lena taimi.
O loo ta’ua i lipoti e faapea o le afiafi o le aso 3 o Iuni, na iai Leatio’o i le fale o lona tina, ma sa iai lona talitonuga ua iai se isi tagata ua suia ai lona tina.
Ma o le taeao loa na sosoo ai, na ala ane Leatio’o ma vave ona oo ane ona mafaufauga e foliga e iai se mea lea e faaletonu, ma ua moomialaillna fai sana gaioiga e puipuia ai o ia a o lei fasiotia o ia e se tasi.
O mafaufauga fenumia’i nei o Leatio’o ua oo ai ia te ia le talitonuga ua tatau ona ia fasiotia le tagata lea a o lei faaoo e lea tagata le oti ia te ia, ae pagā lea, o le tagata lea ua ia fuafua e fasioti o si ona lava tina.
O nei lipoti uma na folasia ma ua faamalieina ai le faamasino, Justice Fitzgerald, e lei iai se talitonuga o Leatio’o, o le tagata lea na ia fasiotia, o lona lava tina, ma e lei manatu foi i lona tatuiina o le loomatua faapea o se gaioiga sese.
O loo ta’ua i lipoti o le tausaga e 2009 na amata ai ona faia fesoasoani a auaunaga o le soifua maloloina o le mafaufau mo Leatio’o, ina ua lipotia faapea e faalogo i leo.
I le 2015 na molia ai i le faaoolima i se tasi o tamaitai o lona aiga, ona sa iai lona talitonuga faapea sa faaoona e lea tamaitai lana meaai, ma na ta’ua e le faamasino e tupu soo pea le tulai mai o le talitonuga lea o Leatio’o faapea o loo taumafai se tasi e faaonā o ia.
O le 2018 na lipotia mai ai e faapea e iai nisi tagata Samoa sa latou soona faia uiga faatiga ia Leatio’o, ma na toe ta’ua ai foi ona talitonuga lava lea e faapea o loo taumafai nisi e faaonā o ia.
Sa faia iai togaifitiga i le tulaga o lona mafaufau ma iai foi ni fualaau na faatonu e inu.
O le tausaga e 2020, na aumai ai se isi poloaiga a le faamasinoga ina faia se iloiloga mai ia i latou ua iai tomai faapitoa ma ta’ua ai le malosi o le sootaga o ona uiga sauā ia ua aliali ma le tulaga faaletonu o lona mafaufau lea sa lei faia iai se togafitiga.
Na faamaonia e fomai le aafiaga o Leatio’o i le schiophrenia aemaise le faafaigata ona sa faaaogā sese foi e le alii fualaau na ia maua, ma taofia ai loa i le iunite o le Tiaho Mai i le falemai o Middlemore i lalo o le tulafono o Mental Health (Compulsory Assessment and Treatment) Act 1992.
O le ogatotonu o le 2021 na toe alu i tua Leatio’o ae sa faamalosia lava le faia pea ona togafitiga seia oo i le masina o Oketopa 2021.
Na amata ona ia teena le toe inu o ana fualaau mo le mafaufau, ona faapea sa iai ni aafiaga mulimuli ane na oo iai, ma ia teena uma isi siaki sa tatau ona toe faia iai ia Novema.
E oo ane ia Mati 2022, ua lē toe faia ni ona togafitiga mai le vaega e vaaia e gafa ma le tausia o le soifua maloloina o le mafaufau i le komiuniti.
Sa faaauau pea ona iai aafiaga o Leatio’o i lona mafaufau ma iai lava foi ma ona mafaufauga faapea o loo iai se tasi o loo taumafai e faaoo le oti ia te ia e ala i le faaoona o lana meaai ma meainu.
O le tulaga faanoanoa i lenei mataupu e pei ona ta’ua e le faamasino, auā o si tina ia Maria Brown, e na o ia lava le tagata o le aiga o lenei alii, sa ano i lana tama ma taumafai pea e tausi e ui i ona faafitauli tau le mafaufau.
O si tina ia Maria e toaono lana fanau, 22 fanau a lana fanau, ma ana great grandchildren e toalua.
O le taimi nei o loo taofia ai Leatio’o i le vaaiga a le Mason Clinic e faatali ai le toe valaauina o lona case i se aso o le masina lenei o Aokuso.
