E iai aiaiga ua tuuina atu e le Kapeneta i le susuga Papalii Panoa Tavita Moala, i le toe foi ai e tauave le tofiga ta’ita’ifono o le Komiti Faatonu o le Faalapotopotoga o le Faaputuga Tupe o le Lumanai Manuia o Tagata le NPF.
Ua faailoa e le Minisita o Tupe le afioga Lautimuia Afoa Uelese Vaai lea vaega o le faaiuga a le Kapeneta, ma lana saunoaga e lei faigofie le faaiuga ina ua iloilo e le Kapeneta le lipoti o suesuega na faia e le komiti o mataupu faalotoifale a lea faalapotopotoga a le Malo i tuua’iga mai nisi o le pulega o le NPF sa faatūtū i le ta’ita’ifono.
O le avanoa i le Minisita o Tupe na fesiligia ai i se tasi o mataupu e faasino i tupe mai paaga a le Malo o Samoa o loo fesoasoani ai i le faatupega o fuafuaga a le Malo i tausaga faaletupe, aemaise o loo faasolo le poloketi miliona tala mo itumalo.
Na faaalia e Lautimuia o tupe o loo maua mai paaga a le tatou Malo e fesoasoani ai i le tala o le tupe, a oo atu loa ona pule lea o le Malo i atina’e e faaaogā iai.
Faaalia e le Minisita o Tupe o le poloketi miliona mo itumalo o loo i le va o le 10 ma le 20 pasene o ia seleni e lagolago ai tala o le tupe o loo faaalu i lea poloketi e pei ona amata faamatuu atu vaegatupe o le miliona tala lona lua mo itumalo faapalota e 51.
O le Aso Lua o lenei vaiaso ua faataatia ai i le Palemene e le Minisita o Tupe le afioga Lautimuia Afoa Uelese Vaai, le tala autu o fuafuaga faaletupe a le Malo mo le isi 12 masina o le tausaga faaletupe o loo sosoo ai nei, lea e amata ia Iulai o le tausaga nei seia oo i le faaiuga o Iuni o le tausaga fou 2025.
