“Walk the talk”

O le tali lea na tali atu ai le faitau afe o faiaoga i le minisita o aoga Jan Tinetti ananafi a o faailoa ane ai e le minisita i faiaoga sa i Ueligitone o loo lagona e le malo o latou leo.

O ananafi lea na leai ai le tele o aoga mai lava i aoga amata seia oo i le tele o aoga maualuluga i le tele o vaega o le atunuu ma aafia ai aoga a le silia ma le 800,000 fanau aoga ae o faiaoga i la latou solo tetee e mafua i le lē lelei o totogi faapea ai tuutuuga o loo galulue ai.

E lei faigofie i le minisita lona faafesagai ai ma faiaoga ananafi, aua o ia foi o se tasi e le gata sa avea ma puleaoga ae sa savalia foi tetee e pei ona faia e faiaoga ananafi.

Saunoa le minisita o lea faatoa tusa ma le fitu vaiaso talu ona tofia e na te tauavea le matagaluega o aoga, e ui e faigata ia te ia lenei mataupu peitai ona o lea na ui mai ai, e le gata e malamalama i lagona o faiaoga ae o loo unaia ai foi o ia e fai se mea e sili atu ma o lana polomisi foi lea i faiaoga ananafi. 

O le asō o loo faaauau ai fonotaga ma feutanaiga i le va o le matagaluega ma iuni o loo tu mo faiaoga a o sailia ai pea se fofo o le mafatiaga o faiaoga.