E lē puleesea le gagana Samoa poo lona uiga, e lē pulea mai fafo le tatou gagana o le tatou faasinomaga.
O le mau lea a Samoa i taumafaiga o loo feagai ma le komisi o le gagana Samoa e sa’ili auala uma e faaolaola ma faatumau ai pea le tatou gagana.
O le vaiaso ua mavae sa faatāua ai le gagana Samoa i le polokalame a le Matāgaluega o A’oga ma Aganuu, ae o le masina atoa lenei o loo faatāua ai lea lava autū i Tutuila ma Manu’a.
O le komisi o le gagana Samoa i Tutuila ma Manu’a, ua galulue faatasi ma le komisi o le gagana Samoa i lo tatou atunuu faapea ma le FAGASA i Niu Sila o se tasi o itutino tāua o loo galue e faaolaola pea le tatou gagana.
O le tatalaina o le fonotaga o le gagana Samoa i Amerika Samoa ua molimauina ai i le saunoaga aami mai le Komesina o le gagana Samoa i Samoa le telē o se galuega e tatau ona faatino e togafiti ai nisi o faafitauli ua aafia ai le tatou gagana.
O le Komesina le susuga Vaiao Alailima Eteuati o loo faauluulu iai le komisi o le gagana Samoa i lo tatou atunuu.
O se vaega o le saunoaga aami i le fonotaga o le gagana Samoa a Amerika Samoa, le Komesina o le komisi o le gagana Samoa i Samoa, susuga i le faife’au mālōlō penisione, susuga ia Vaiao Alailima Eteuati, i se faasalalauga tuusa’o mai lea fonotaga.
