E lē o se taimi lelei lenei mo le Ford e tula’i mai ai se faafitauli i ana taavale e alu i le eletise a o aga’i uma ai tagata e faatau taavale eletise ina ua taugatā le tau o le penisini mo taavale alu i le penisini.
Na faailoa e se tasi tagata e iai sana taavale Ford hybrid se faafitauli na tula’i mai i le maa o lana taavale ma ia ta’ua ai e matuā sese lava le taimi ua tula’i mai ai lenei faafitauli.
Ta’ua e le kaupani taavale a le Ford, ua tusi atu nei ia i latou uma na faatauina le latou taavale ituaiga Escape PHEVs e faailoa iai le faafitauli i le maa poo le battery, ona e ono oo ina mu ma sasao ane ai se afi pe afai e matuā fully charged.
O se uaea atonu o iai se faaletonu i le maa o le taavale lea atonu e sioki ma mu ai pe a oo ina ataotoa le fafagaina, ae iai le talitonuga o le kamupani, e lē o ana taavale uma i lea ituaiga o loo afaina ai; fai mai e itiiti ifo i le tasi le pasene taavale ua faailoa mai le aafia i lea faaletonu.
I Niu Sila lava ia, e lē o iai ni faalavelave faapea ua iloga mai, ma e lē o iai foi ni maa o ia taavale ua fesiligia le tulaga lea.
Ae peitai mo se puipuiga lava, ua talosagaina ai e le Ford ana paaga uma o loo faatauina lana ituaiga o taavale lea, afai e aga’i e fafaga le maa o le taavale, e lelei ona faagata i le 80 pasene le tele o le eletise ma ia na o le auto EV mode e aveina ai le taavale; ua faamautinoa mai e lē o se faafitauli e faapea ai o le a taofia le aveina o le taavale.
Fai mai le sui o le kamupani, o loo faia sailiiliga uma a le Ford mo se vaifofo tumau o lenei faafitauli ma o le a toe fesootai atu lava i ana paaga i le taimi e faamautinoa ai lea vaifofo.
Puna o Faamatalaga: https://www.rnz.co.nz/news/top/590915/ford-hybrid-problem-couldn-t-have-happened-at-a-worse-time
