Ua faamaonia mai e leoleo, o le faalavelave na tula’i mai i le vaiaso talu ai i Murvale Drive, Bucklands Beach, e lē o se mū na alia’e ona o se faalavelave na tupu faafuase’i, ae ua o latou faatino ai nei su’esu’ega ona o le latou iloa, na faatino lava e le tagata.
E to’atolu i latou na mafai ona faasaoina mai le mū lea se’i vaganā ai ni tagata se to’alua ua faamaonia le maliliu mai le mū.
O lenei faalavelave na tula’i mai poo le ‘afa tonu o le itula e 2 i le vaveao o le Aso Tofi o le vaiaso na te’a nei.
Faamaonia e Detective Inspector Tofilau Faamanuia Vaaelua, o le Counties Manukau District Police, o lea matāupu ua o latou taga’i iai o se gaioiga a se tagata lea ua māfua ai lea faalavelave, o lona uiga e le’i tupu fua lenei mū; talu ai faamaumauga ma sa’ili’iliga a le ‘ausu’esu’e na o latou maua i le nofoaga.
I iloiloga o loo masalomia e leoleo o i la’ua ua fano soifua o se tamā e 36 tausaga le matua, ma lona atalii e 11 tausaga le matua, e ui o loo taumafai pea e faamautū ma faamautinoa lelei faamaumauga i sa’ili’iliga poo ai tonu ia tagata.
O le isi to’alua e to’atolu ai i latou na faasaoina mai le mū ua te’a nei i tua mai le faalema’i.
Ua talosagaina ai nei e Tofilau le mamalu lautele poo ai lava se tasi o silafia se faamatalaga e uiga i lenei faalavelave ina ia faafesoota’i atu, aemaise lava i latou o loo iai mea pu’eata CCTV o le faaitu na tupu ai le mū.
O le a taumafai pea leoleo e as’ili lē na faia lea gaioigafaalēalofa ua fano ai soifua o tagata e to’alua.
Puna o Faamatalaga: https://www.facebook.com/share/p/1CnBMGstak/
