I le aumai ai o se finagalo o le Minisita o Faatoaga ma Faigafaiva ua ia ta’ua ai o le a taatia i se finagalo o le Kapeneta lona tofi Minisita, ua faailoa e le ta’ita’i o le Malo le afioga i le Palemia i se faasalalauga, e lē faatauvaa le molia o se Minisita e ui e lē o se moliaga tau i le tofiga.

O loo faasino lea finagalo o le ta’ita’i o le malo i le faia ai e leoleo o moliaga o le Minisita o faatoaga ma faigafaiva, e pei ona faailoa i se faasalalauga mai le ta’ita’i o le malo na aumai faalaua’itele i le taeao o le Aso Faraile na te’a nei.

O lea faasalalauga o loo faailoa ai e le Palemia, le afioga Fiame Dr Naomi Mataafa o le a lē avea le aafia o le tofiga Minisita o Laauli e tulaga ese ai le faatinoga o le faagasologa o le tulafono, i ni soligatulafono.

O le faagasolo o le mataupu o loo tuua’ia ai le Minisita, o se faipule ma se tasi sa avea ma ta’ita’i leoleo, o se ulugalii ma se tamaitai ua galue nei faatusitala, ua tatau ma talafeagai e pei ona faailoa e le Palemia i le faasalalauga.

Faaalia e Fiame o inā e su’esu’e ai moliaga uma ma iloa ai i le taunuuga pe faamaonia pe lē faamaonia ia tuua’iga.

O le faamasinoga foi e pei ona faaalia e le Palemia o le malu lea faaletulafono e avanoa mo soo se tagata Samoa e sa’ili iai le amiotonu.

Faaalia lava e le ta’ita’i o le Malo o le faigamalo a le Faatuatua i le Atua Samoa ua Tasi na faatula’i mai ma lana anava tauave o le pule faaletulafono, ma o le faai’uga foi a le faamasinoga na faamaonia ai le faatautoga o sui o le Palemene i le fale’ie, na mafua ai ona tatala le to’a o le ulufale o le Malo fou.