E le o lagona ma e le o malamalama lelei foi sui o le soifua maloloina i lagona o tagata o loo ui i le Long Covid.
O auga faaumiumi nei o le Koviti ua ta’ua o le Long Covid, ma e aofia ai le faigata ona mānava, tiga maso o le tino, galogalogofie mea i le mafaufau faapea ai ma le tiga o sooga o ponaivi.
Mai tagata na fesiligia i se suesuega na faatautaia e le Iunivesite a Victoria i Ueligitone, o le ‘afa o i latou na fesiligia o loo iai le lagona e le o malamalama lelei le aufaigaluega a le soifua maloloina i auga o loo maua ai ma ua sau ai ma lagona e le o faalogo atu se isi.
O ni faaiuga ua sau ai ma le fautuaga agai i le malo e faia se vaega faapitoa tau auaunaga a le soifua maloloina e faapitoa lava mo tagata e maua i le Long Covid.
Na maua ai foi i le suesuega o tagata Maori, Pasefika ma i latou e iai manaoga faapitoa, o i latou o loo sili atu ona mafatia i itu tau tupe, soifua maloloina atoa ai ma le mafaufau e mafua mai ona o le Koviti ma ona aafiaga.
O tagata na fesiligia e le suesuega o i latou na maua le Koviti i luma atu o le uluai aso o Tesema o le 2021, ma o lea foi na iai le sao o le matagaluega a le soifua maloloina i totonu o lenei suesuega.
