O le fesoasoani faaletulafono o le seleni lea e totogi e le malo i se tagata ua talosagaina se fesoasoani ona ua lē gafatia ona totogi lava e ia se loia e finauina lana mataupu i luma o le faamasinoga.
Ma i le maitau i le tausaga ua mavae i luma o le faamasinoga maualuga e tele ma anoanoai mataupu e moomia ai le fesoasoani a le malo.
I le faatalanoaga ma le Ofisa Sili o le Matagaluega o Faamasinoga, le Susuga Papalii John Taimalelagi Afele na ia ta’ua ai e $450,000 tala le tupe ua faamatuu atu e le malo e faatino ai lea polokalame fesoasoani.
Peitai na faaalia manino e le Ofisa Sili e lē o lava le seleni ua faamatuu atu mo lea polokalame fesoasoani pe a fua i le toatele o tagata na talosaga atu mo se fesoasoani i le tausaga ua mavae, ma o le fuafuaga ua iai nei, o le tausaga faaletupe fou o le a tuu atu ai le talosaga a le matagaluega mo se siitaga o lea seleni ona na saunoa Papalii o le agaga o lea polokalame ia ave le fesoasoani mo tagata e lē o gafatia ona totogi e latou a latou loia.
Saunoa manino foi le Ofisa Sili e lē o moliaga uma e agavaa i lalo o le polokalame fesoasoani a le malo ua na o mataupu matuia e aofia ai le fasioti tagata faamoemoeina ma moliaga tau faigaaiga fai faamalosi faapea ai ma mataupu tau gaoi a o avea ma tagata faigaluega i galuega i totonu o le atunuu.
Ae mo mataupu tau laau ma fualaau faasāina na faaalia manino e Papalii, e lē aofia ai i le polokalame, ona o le manatu o le Matagaluega ia aua ne’i faigofie i tagata o loo faia lea soligatulafono ona iai se manatu e faigofie ona faagasolo a latou mataupu ona o loo totogi e le malo a latou loia.
Peitai na faaalia e Papalii i lalo o le tulafono faavae ma le taatiaga o aiātatau a tagata e agavaa lava soo se isi i le tupe fesoasoani a le malo peitai o le faatulagaga lava lea na faatulaga mai ai e le matagaluega ona o le utiuti o le faasoa.
