‘E ui e le o iai ni tulaga lelei mo Ausetalia mo le taimi nei i le mataupu i fefaataua’iga ma Saina peitai o le mataupu lea o loo agai atu i le ituala sa’o,’ o le saunoaga lea mai le minisita o fefaataua’iga a Ausetalia o Don Farrell lea faatoa foi mai Saina i lana malaga e pei ona lipotia atu e talafou i le vaiaso talu ai.
O lana faatalanoaga ma le aufaasalalau i le mataupu na malaga ai ua ia faailoa e le foia le mataupu lea i tariffs i luga o oloa a Ausetalia, i se taimi vave ae sa mafanafana lava i le la fonotaga ma le minisita o fefaataua’iga a Saina.
Fai mai le minisita ua iai ataata o ni tulaga lelei aemaise o lea ua toe aveina atu le cotton mai Ausetalia i maketi a Saina faapea foi ma le copper ma o le a faaauau pea le finau.
O le mataupu i le barley e pei ona ia faailoa e ono faamautuina lea i le masina fou pe lua foi ni masina e pei ona saunoa ai Farrell.
