A o tapena le tulafono ia foia ai le telē o le eseesega o totogi i le va o alii ma tamaitai, e lē o manuia ai le silia ma le miliona tagata galulue, e aofia ai ma tagata Pasefika.
O se saunoaga lena a le Komesina o le Equal Employment Opportunities Dr Saunoamaalii Karanina Sumeo ma e le gata foi la i tagata Pasefika, ae faapea tagata Maori, ae faapea ma isi mai atunuu i fafo.
O le vaiaso talu ai na faalauiloa ai e le malo e iai le system o loo manao e faia e pisinisi ma le faamoemoega ia faia ai se suiga i le faafitauli o iai nei o le lē tutusa o le faiga o totogi.
O le faatulafonoina o lenei lipotia o lea e lei tusia ma e moomia ai fale faigaluega e silia ma le 250 tagata faigaluega e faailoa le tele e eseese ai totogi o alii ma tamaitai, ma a uma le 4 tausaga ona faia foi lea e pisinisi e toaselau tagata faigaluega.
Peitai i le silasila a le Komesina, e lē o manuia ai tagata Pasefika i lenei faiga auā o le toatele o o tatou tagata e galulue mo pisinisi laiti, ma i le silasila a Saunoamaalii e leai ma se uiga o lea tulafono pe afai o lea e misi ai le faitau miliona o tagata galulue.
O le 2021 na faamauina ai i totonu o le tasi le tala o loo maua e le alii papalagi, e na o le 81 sene e maua e le alii Pasefika, ae o le tamaitai e 75 sene ma o tagata Pasefika lea e maualalo ai lava i le faatulagana.
A o loma le palota tele, e lē o popole Saunoamaalii poo ai e tu mai e tauavea le faigamalo ae pau lona manao ia aua le faataaloa i faiga faapolokiki ae faia le mea sa’o.
