Ua leai mai le council a Ueligitone na te faatupeina le pulea ma le faatonuina o taavale feoai a o faia ai le solo tetee a le School Strike 4 Climate i Ueligitone.
O le tali lea ua aumai, ma ua le iloa ai nei e fanau aoga o loo tuufaatasia lea savali poo fea a maua mai ai le $5000 o loo moomia vave.
O lenei vaegatupe e faapea e totogi ai e le council kamupani tutoatasi o le a gafa ma le faatonutonuina o taavale aua le saogalemu o tagata feoai.
I tali mai ai o le Council, o lea sa ia faatupeina nei auaunaga i solo tetee e lua na faia muamua a le kulupu lenei, ma o lea lava foi sa faailoa iai i le taimi na faatalosagaina ai le tetee muamua ma le lona lua, e uma loa solo tetee ia e lua, ona faatupe loa lea e fanau aoga o loo tuufaatasia a latou lava solo tetee.
O se tali ua toe sui ai nei le tonu, ma e ui o le a faataunuuina pea le faamoemoe, ae o le a leai se solo tetee ae tau ina faamaopoopo fanau i le malae o le Palemene i le Aso Faraile o le vaiaso a sau.
O le sini autu o lenei faamoemoe, o le faaleo lea o le popolega o fanau aoga i suiga o le tau.
