E le o iai se fuafuaga a le malo e mulimuli ia Ausetalia ma le faasā o telefoni feaveai mai fanau aoga.
O New South Wales le setete lata mai o Ausetalia ua faamamaluina le tulafono o loo faasā ai telefoni feaveai ma o Oketopa o le tausaga nei o le a aloaia ai le faasā i aoga uma e aofia ai aoga a le malo faapea aoga tutoatasi.
O le sā lenei na amata e aoga tulagalua ma o lea ua oo atu i aoga maualuluga.
Ae tuu mai ia Niu Sila e iai nisi o aoga ua faia lava e a latou pulega le faasā o telefoni feaveai ma fanau aoga a o iai i totonu o aoga.
Peitai na ta’ua e le minisita o aoga Jan Tinetti, ua ia faamanino e leai sona manatu e faia se sā mo aoga uma i totonu o Niu Sila.
O Tinetti o se tasi sa faiaoga muamua ma a o leai mai ai, na ia tautino o le telefoni feaveai o se meafaigaluega aogā ma e tuu atu pea le faitalia i le aoga lava ia e faia ai lana faaiuga i le faataga poo le faasā.
